Кагылып коңгуроонун жаңы үнү, башталды жаңы окуу жылы, билим күнү!
Кагылып коңгуроонун жаңы үнү,
Башталды жаңы окуу жылы, билим күнү.
Жадырап бөбөк шашып сабагына,
Арналат мугалимге тунук сүйүү- деген ыр саптары бүгүнкү күнгө куп жарашып, адаттагыдай эле Профессор А.Молдокулов атындагы Улуттук инновациялык технологиялар мектеп-лицейи сүйүктүү окуучуларына өз эшигин ачты.
Салтанаттуу линейка Кыргыз Республикасынын Гимни менен ачылып, барабандын коштоосунда мектеп-лицейдин желеги алынып келинди. Кадырлуу коногубуз, Билим берүү жана илим министрлигинин башкы адиси Алдашев Канжарбек Бакытович майрам күнү менен жалпы мектеп жамаатын куттуктап, агартуу тармагындагы алгылыктуу иштер жана алдыңкы жылдарда аткарыла турган пландар, жагымдуу маанайлар менен бөлүштү. Билим күнүн даңазалаган ыр саптары окуучулардын аткаруусунда көркөм айтылып, улуттук бийлер менен коштолду. Мектеп босогосун аттаган жаш бөбөктөр үчүн алгачкы коңгуроо үнү жаңырып, аруу тилектер, ой максаттар айтылып, куттуктоо ырлары жаңырды. Мындан аркы окуу процесси ар бир мугалим жана окуучу үчүн жемиштүү, чыгармачыл, жана ийгиликтерди багындырсын деген тилек менен салтанаттуу линейка жыйынтыкталып, окуучулар класстык-тарбиялык сабактарга киришти.
