9-сентябрь Комуз күнү

Кыргыз элинин салттуу музыкасында өзгөчө орду бар, байыркы элдик аспап "Комуз күнүн"  белгилөө жалпыбыз үчүн өзгөчө сыймык.  Бул күндө мектеп-лицейибиздин комузчулар ансамбли  Атай Огомбаевдин  «Маш  ботой», Болуш Мадазимовдун «Эргиме»,  Ыбрай Тумановдун  «Жаш тилек» күүлөрү менен окуу күнүн баштап беришти. Философиялык мааниси терең, кыргыз элинин каада-салтын, турмуш-тиричилигин, маданиятын чагылдырган  күүлөр  мектеп ичинде жаңырып, комуз күнүн өзгөчө шаңга бөлөдү. Мектеп администрациясы  окуучуларды   таң эрте комуз күүлөрү менен эле тосуп албастан,    комуздун  тарыхы, баалуулугу, укумдан -тукумга мурас катары өтүп келе жаткандыгы туурасында  да баяндап беришти. Анда  комуз өнөрүн аркалоо аркылуу кыргыз элинин  руханий  баалуулуктарын  даңазалоого,  унутта калтырбай, муундан- муунга өткөрүүгө болоору айтылып, келечекте залкар комузчулардын чыгуусуна үмүттөр артылды.