Ата-энелер үчүн семинарлар
Бүгүн мектеп-лицейде 1-4-класстын ата-энелери үчүн “Окуучулардын таанып-билүү, кызыгуусун арттыруу” темасынын алкагында баланын жеке кулк мүнөзүн аңдап билүү жана терс мүнөздөрүн жөнгө салуу туурасында семинар өттү. Жеке жөндөмдүүлүктөрү, кызыгуулары жана көйгөйлөрү туурасында ата-энелер менен биргеликте талкууланып, өз ара пикир алмашуу жүрдү.
5-7-класстын ата-энелери үчүн “Өспүрүмдөрдүн жетилүү курагындагы кыйынчылыктарды чечүүдөгү ата-эненин ролу” темасынын алкагында өспүрүм курактагы психологиялык жана физиологиялык өзгөчөлүктөр, эффективдүү баарлашуу жана конфликттерди чечүү маселеси, баланын эмоционалдык жана психологиялык абалын колдоого алуу, технологиянын жана социалдык тармактардын өспүрүмдөргө тийгизген таасири туурасында баарлашуу жүрүп, ата-энелердин окуучунун образындагы ролдоштурулган кырдаал чагылдырылды.
8-11-класстар үчүн “Көз тарбиясы” аталышындагы семинарды Коомдук фонд, Билим берүү инновациялык технологиялар борборунун “Ата-энелер мектебинин” тренери Рай кызы Рахаттын алып баруусунда бала тарбиялоонун бир нече ыкмалары чакан топтордо талкууланып, ата-эненин эмоциясы, баланы уга билүү жөндөмү, сүйлөшүү маданияты туурасында кызыктуу маалыматтар айтылды. Бала ата-энесинин реакциясын, мамилесин жана сүйлөө ыкмасын кабылдап, өзү да ошондой мамиле калыптандыраары, үй-бүлөдө туура коммуникация түзүү маанилүү экендиги баса белгиленди.
Семинарга катышкан ата-энелер балдары менен туура жана натыйжалуу мамиле түзүүдө алардын эмоционалдык, психологиялык жана социалдык өнүгүүсүн колдоо үчүн керектүү билим жана көндүмдөр туурасында педагогикалык жардам үчүн терең ыраазычылыктарын билдиришти.
