Геология музейине саякат

Бүгүн Кыргыз Республикасынын Жаратылыш ресурстары, экология жана техникалык көзөмөл министрлигиндеги С.А.Игемдбердиев атындагы Геология музейине  УИТМЛдин  “Жаш экологдор- туристтер” ийриминин окуучулары “Геология- балдардын көзү менен" темасынын алкагында экскурсияга барышты.  

Окуучулар Кыргыз Республикасынын геолог адиси, геология илиминин ардактуу илимпозу Такенов Нургазы Такенович менен жолугушуп, геология илими, тоо тектери, түрлөрү, минералдар, алардын пайда болушу,  изилдөө, казып алуу иштери жана алардын колдонулушу боюнча кызыктуу маалымат алышты.

Геология музейинин атын алып жүргөн Самибек Абазович Игембердиев тууралуу да музейдин адистери бир нече эмгектерин санашып, Кыргызстанда алтын, калай, вольфрам, сымап, сурьма, жез, сейрек кездешүүчү металлдар, көмүр, гранит, мрамор жана башка пайдалуу кендердин  ачылганын,  алардын негизинде ири тоо-кен ишканалары бар экендигин баяндап беришти.

Окуучулардын геология тармагындагы билимдерин тереңдетип,  геологиянын карьералык мүмкүнчүлүктөрүн адистердин айтуусунда угууга  жана  илимге болгон кызыгууларын ойготууга багытталган  музейдеги саякатка  “Жаш экологдор- туристтер” ийриминин жетекчиси Токтоналиева Айша Соотбековна жетектеп барды.