“Асыл таштар” көчмө көргөзмөсү
2025-жылдын 26-27-март күндөрү Кыргыз Республикасынын Билим берүү жана илим министрлигинин алдындагы Республикалык экология, жерин таануу жана туризм балдар-өспүрүмдөр борбору “Асыл таштар” көчмө көргөзмөсүн УИТМЛде өткөрүүдө. Көчмө көргөзмө саякатын окуучулар үчүн мектептин базасында уюштуруу демилгесин мектеп директору Асанова Мелискан Биримкуловна жана “Жаш экологдор-туристтер” ийриминин жетекчиси Токтоналиева Айша Соотбековна көтөрүп, борбордун директору Рыскулов Уланбек Калыбаевичке жана борбордун уюштуруу иштери боюнча бөлүм башчысы Бердибекова Айжан айымга кайрылуу менен 2 күндүк акысыз көргөзмө уюштурулууда.
Көргөзмөнүн максаты окуучуларга минералдар, асыл таштардын түзүлүшү, геологиялык процесстери, касиеттери, аларды колдонуу жана баалуулугу тууралуу маалымат берүү болуп саналат.
Көргөзмөдө Республикалык экология, жерин таануу жана туризм балдар-өспүрүмдөр борборунун адистери менен биргеликте “Жаш экологдор-туристтер” ийриминин окуучулары да гид катары асыл таштар тууралуу маалымат беришүүдө.
“Асыл таштар” көчмө көргөзмөсү Кыргызстандын аймагынан алынган баалуу таштар тууралуу кызыктуу маалымат менен бөлүшүү максатында мектеп окуучуларын жана кызыктар тараптарды УИТМЛдин башталгыч класстар мектебинин жыйындар залында күтөт.
