Сыймыктуу жолдун башаты — мектеп

Айдаркан Молдокулов атындагы Улуттук инновациялык технологиялар мектеп-лицейи — жүз жылдык тарыхында мекендин ар тармагында эмгектенген миңдеген бүтүрүүчүлөрдү тарбиялап чыгарган кадырлуу билим уясы. Мектептен билим алып, кийин мамлекеттин, илимдин, медицинанын жана башка тармактардын өнүгүшүнө чоң салым кошкон бүтүрүүчүлөр бүгүнкү күндө Кыргызстандын сыймыктуу инсандары катары таанылып келишет.

Темир Сариев — Кыргыз Республикасынын көрүнүктүү мамлекеттик ишмери, мурдагы премьер-министр, 1-класстагы мамлекеттик кеңешчи класстык чининин ээси. Ал экономика, финансы жана мамлекеттик башкаруу системасындагы ири реформалардын демилгечиси болгон.

Тайырбек Сарпашев — мамлекеттик ишмер, ар кыл жооптуу мамлекеттик кызматтарда иштеген. Анын ичинде Мамлекеттик каттоо кызматынын жетекчиси, экономика министри жана өкмөттүн жогорку даражадагы өкүлү катары да элге таанылган.

Тамара Карашева — математика илимдеринин кандидаты, илимий-педагогикалык чөйрөдө эмгектенип, билим берүү жана илим тармагына чоң салым кошуп келет.

Марат Султанов — Кыргыз Республикасынын мамлекеттик ишмери, Жогорку Кеңештин депутаты жана каржы-экономикалык саясаттын тажрыйбалуу өкүлү.

Акылбек Мусаев — медицина илимдеринин доктору, саламаттыкты сактоо тармагында ар тараптуу иш жүргүзүп, медицина тармагында тажрыйбалуу адис катары белгилүү.

Эркин Орозакунов — хирург-трансплантолог, адам өмүрүн сактап калууда күнүмдүк күрөш жүргүзгөн дарыгер. Орточо эмес, жогорку кесипкөйлүк деңгээлде органдарды көчүрүп отургузуу (трансплантация) сыяктуу татаал операцияларды жүргүзүп, Кыргызстандын медицина тармагын жаңы деңгээлге көтөрүүгө салым кошуп келет.

Бул инсандар — УИТМЛдин ардактуу бүтүрүүчүлөрү гана эмес, алар бүгүнкү жаш муун үчүн үлгү боло турган улуу инсандар. Алардын ийгилиги, элге кызмат кылуудагы талыкпаган аракети жана кесипкөйлүгү мектеп берген терең билимдин, татыктуу тарбиянын жемиши болуп саналат.