Улуу муун эскерет

Айдаркан Молдокулов атындагы Улуттук инновациялык технологиялар мектеп-лицейи (мурдагы №5-мектеп) — 100 жылдык тарыхы менен өлкөбүздөгү алдыңкы билим берүү мекемелеринин бири катары өзгөчө орунду ээлейт. Бул даңазалуу мектеп тууралуу өз учурунда ошол жерде иштеп, жаш муунга билим-тарбия берген инсандардын эскерүүлөрү өзгөчө мааниге ээ.

Кыргыз Республикасынын эмгек сиңирген мугалими, эл мугалими, педагогика илимдеринин доктору, профессор, КР Улуттук илимдер академиясынын корреспондент-мүчөсү жана Педагогикалык илимдердин эл аралык академиясынын мүчөсү Исак Бекбоев мектепте 1953–1959-жылдары жогорку класстарга математикадан сабак берип, класс жетекчи болуп иштеген.

Аттуу педагог ал жылдарды мындайча эскерет:

«Мен ошол мектепте 1953–1959-жылдары жогорку класстарда математикадан сабак берип, класс жетекчи болуп иштедим. Бул мектепке республиканын бардык райондорунан окууну эңсеп каалаган жаштар келип, алар үчүн атайын уюштурулган чоң интернатта жатып окушчу. Мектептин окуу кабинеттеринин жабдылышы жакшы болчу. Эң башкысы — мектептин мугалимдер коллективи өтө күчтүү эле».

Бул сөздөрдөн мектептин ошол жылдардагы деңгээли, окутуудагы жаңычылдык, билим сапатына болгон өзгөчө мамиле жана мугалимдердин кесипкөйлүгү ачык көрүнүп турат. Ал жылдары мектеп өз мезгилинин интеллектуалдык борборлорунун бири болуп, өлкөнүн ар тарабынан келген зээндүү жаштарга сапаттуу билим берген.

Исак Бекбоев сыяктуу инсандардын эскерүүлөрү — бул мектеп тарыхынын жандуу энциклопедиясы. Алардын эмгеги, турмуштук тажрыйбасы жана педагогикалык салымы бүгүнкү муунга чоң сабак жана мотивация болуп берет.